AKSI NYATA P5 SORA DEMOKRASI DI SMPN 5 CIAMIS, PILKETOS/WAKETOS
CIAMIS - Grup Warta Sunda
SMPN 5 Ciamis (18/1) ngayakeun kagiatan pamilihan ketua jeung wakil ketua OSIS pikeun masa bakti 2024-2025. Kagiatan ieu dilaksanakeun lantaran masa bakti pangurus OSIS taun 2023-2024 geus lekasan.
Kagiatan ieu diiluan ku opat
pasang calon pupuhu jeung wakil pupuhu OSIS. Paslon kahiji nyaéta Sidki Edgina
Nuh Zarli ti kelas 8F jeung Keyra
Maulida Anindita ti kelas 7C, paslon nomber 2 Nurul Uswotun Wahidah ti kelas 8F
jeung Nafis Febriyansyah kelas 7B, paslon nomber 3 Ivana Adelina Azmi ti kelas
8C jeung Alfath Rafi Fauzan A ti kelas 7D, jeung paslon nomber 4 Nazilla
Pamungkas 8C jeung Rizaldi Fikri kelas 7F.
Kagiatan ieu lumangsung di buruan
kampus SMPN 5 Ciamis kalawan kapaniciaan ti réngréngan pangurus OSIS heubeul.
Kagiatan ieu diiluan ku sakumna siswa, déwan guru, jeung stap tata usaha di
lingkungan SMPN 5 Ciamis.
Dina bubukana kapala sakola, Elan
Suherlan, S.Pd., nétélakeun yén ieu ieu téh mangrupakeun pangajaran nyata,
miniatur démokrasi, nu dipalar siswa sahenteuna geus boga bekel dina hirup
kumbuh nyata di masyarakat jaga dina hal démokrasi hususna pemilu. Siswa teu
ngan ukur dibéré tiori di kelas wungkul tapi ogé ku aksi nyata. Ku kituna kaayaan jeung prosédur kagiatanna ogé sina
ciples pemilu mun keur milih caleg atawa pilprés.
Kapala sakola ogé miharep,
kagiatan ieu bisa dijaga kondusifitasna, kaamanan, katartiban, kajujuran,
jeung kalancaranna. Saha waé paslon nu
kapilih sing bisa mawa kamajuan pikeun SMPN 5 Ciamis hususna OSIS-na.
Runtuyan kagiatan pilketos/waketos
ieu dimimitian ku seléksi calon kandidat, masangkeun calon kandidat, ngawangun tim suksés unggal paslon, kampanyeu
sakabéh paslon boh nu mapay ka unggal kelas pon kitu deui nu sifatna di ruang
publik nu leuwih gedé nyatana di lapang upacara. Kagiatan saterusna nyaéta uji
kelayakan calon ku tim peniléy ti kesiswaan jeung guru liana. Aya kagiatan
ngabedah visi misi ti unggal-unggal paslon nu terus dikoméntaran, dibéré
kamandang ku para guru nu ditunjuk jadi tim pangajén paslon.
Kagiatan dina poéan nyoblos
dimimitian ku ngalantik panicia pamilihan nu langsung ngucapkeun sumpahna
dipingpin ku pupuhu sakola. Saterusna
panicia mimiti tatahar jang palaksanaan kagiatan pamilihan. Ngecék deui ti mimiti tempat tunggu, kaayaan kotak suara, surat suara, absén bukti tas nyoblos, ngecék
data pamilih, ngabagi tugas panicia sina nempatan pos séwang-séwangan, jsté.
Pamilihan dimimitian ku
pupuhu sakola, ditéma ku para guru,
terus siswa. Téhnikna perkelas. Dimimitian ku kelas 9A, 8A, 7A. Bérés éta
diteruskeun ku 9B, 8B, 7B, jeung saterusna nepika kelas F.
Rérés éta diselang ku acara
hiburan nu mangrupa pintonan seni wawakil ti unggal kelas bari nungguan panicia
bėbérés TPS jang sési ngitung hasil pamilihan. Bada lohor diteruskeun ku
ngitung sora kalawan nu meunang paslon
nomber 1. Kagiatan saterusna mah nyaéta pléno jeung biantara ti paslon nu
meunang pamilihan.
Kagiatan ieu ogé sakaligus jadi bahan atawa matéri kagiatan P5
pikeun kelas 8 nu mawa jejer suara démokrasi. Kabeneran SMPN 5 Ciamis
mangrupakeun salah sahiji sakola penggerak di Kabupaten Ciamis nu pangheulana
maké kurikulum Merdèka. Dina hal ieu siswa kelas 8 dipamrih maham konsép,
kagiatan, jeung prosés demokrasi di nagara urang umumna, di sakola dina hususna
tina aksi nyata ieu. Siswa kelas 8 ogé dipamrih nyieun vlog tumali jeung
kagiatan pilketos waketos ieu pikeun nerapkeun pangajaran abad 21 nu diadumaniskeun
jeung matéri projék.***
Kintunan ti : Abah Unang Ciamis
0 Response to "AKSI NYATA P5 SORA DEMOKRASI DI SMPN 5 CIAMIS, PILKETOS/WAKETOS"
Posting Komentar