SUKARELAWAN TRIKORA/DWIKORA

 

SUKARELAWAN

“Mapag Hari Pahlawan, keur para pahlawan anu pandeuri. Pitulung Alloh SWT tadi téa sudah suratan, dina tanggal 27 Nopember 2019 sagala persyaratan-persyaratan TRIKORA/DWIKORA téh car lancar rés bérés ta ieu, hasil perjuangan téh. Hal ieu sakabéhna berkat ti Alloh SWT, ogé gawé bareng nu rancagé antara stake holder, hususnna ti kantor MINVET, nyaéta KAPTEN HÉRYAWAN, KAPTEN WAWAN jeung SERDA SAEPUL.”

 

L

ain ria jeung sajabana dicaritakeun téh, ieu mah bané baé nya’ah ka generasi penerus, tadi téa urang sami-sami ngeusian kamerdikaan, dina widangna masing-masing, ogé itung-itung studi banding baé ceuk istilah wakil-wakil rakyat mah, nu lima taun ogé acan digarawéna téh, geus anprah (usul) ménta arsip alias pangsiun, teu nyakola banget.

Teu karasa umur téh geus kepala dalapan, asa cikénéh mah asup ka SR genep taun tamat taun 1953. Asup ka SGB opat taun tamat taun 1957. Asup ka SGA tamat taun 1960.

Sataun ogé henteu cicing diimah téh, kurunyung surat tugas, dibenum jadi guru SR taun 1961, di Muara Walungan Citarum (SR Muara Gémbong). Kabupatén Bekasi alam harita mah karek 13 kecamatan.

Ari basa nu dipaké téh bahasa Batawi campur Sunda, campur Jawa Réang. Nyokot gajih ka Jakarta/Tanjung Priuk jalanna téh, maké parahu, terus ka kantor di Cikarang, tilu bulan sakali, kacipta nya!

Ngan satau gé henteu jadi guru SR téh, ditarik ka Kantor Inprasarlub (PDK) kacamatan, da kakurangan pagawé cenah. Ari kuring da prajurit téa nurut wé kabeneran bujangan kénéh harita mah. Ceuk legegna mah ti fungsional ka struktural, teu nyekrup, teu nanaon da tugas éta mah.

Atuh datang pangheulana, balik pangpandeurina. Lamun dina jaman kiwari kitu bérés meureun ieu Muspida jeung Muspida Plus téh, Dinas dan Dinas Vertikal téh, jararauh boa KPK ogé bisa-bisa moal aya boa, tadi téa da jalujur.

Éta diluhur bieu kajadian taun 1961-an. Taun 1963-an aya panggilan PERTIWI, nyaéta kudu ngarebut IRIAN BARAT (PAPUA ku ayeuna mah) ti penjajah Belanda. Nya kuring asup jadi SUKARELAWAN alias SUKWAN téa.

Teu ujug-ujug dikirimkeun ka perbatasan, tapi pendidikan dasar kemiliteran heula di DODIK II PANGALENGAN, lilana opat bulan, salaku anggota ABRI, ANGKATAN DARAT bagian INFANTRI.

Puguh baé deui-deui henteu nyekrup anu tadina ÉLMU BUMI, ÉLMU HAYAT, hayoh diganti ku nyonyo’o bedil perang, saperti GEREN, KAREL GUSTAF, SMR MADSEN, MORTIL 5, GARANAT TANGAN, geus puguh PESTOL mah. Pokona sarupaning ka SOLDADUAN wéh, geus puguh ari Peraturan Disiplin Tentara mah, ka buuk-buuk apan kudu digundul, teu cara PNS/ASN jalabrig siga sayang heulang. 

Ilustrasi : Nalika Darajat Tisnawijaya keur mancen tugas 1964 di IRIAN BARAT

salaku Sukarelawan TRIKORA/DWIKORA.* 

Saterusna dina hal ieu mol dicaritakeun sagemlengna da rahasia tentara. Caritana pertengahan 1963-an tengah peuting kuring saparakanca diterjunkeun dibumi CENDRAWASIH IRIAN BARAT téa, wewengkon pedalaman MERAUKE.

Lima poé lima peuting gugulayunan dina tangkal dileuweung geledegan IRIAN BARAT. Kumaha turun jeung sajabana, kapaksa tali parasit disambung-sambung. Datang ka handap embel samet beuheung, can gangguan sasatoan, saperti léntah, oray, buaya jeung réa-réa deui.

Didieu, tentara maraotna téh lain ku pelor-pelor teuing, tapi ku alam ogé sasatoan. Ari tentara kiwari mah ti mimiti asup nepi ka pangsiun téh iraha boa perang, komo PNS mah, tadi téa... jalabrig nu aya.

Bérés tugas TRIKORA diteruskeun kana tugas DWIKORA, nyaéta waktu Indonésia konfrontasi jeung MALAYA, kiwari MALAYSIA, Bung Karno jeung Tengku Abdurahman, GANYANG MALAYA.

Dileuweung geledegan deui baé tugas téh, nyaéta dipedalaman KALIMANTAN TIMUR, ngawates jeung KALIMANTAN UTARA (Kaltara), ti taun 1964 – 1966 ieu ogé moal dicaritakeun sagemblengna, tadi téa rahasia tentara. Kasimpulan alam harita, INDONÉSIA BARAT, jeung INDONÉSIA TENGAH komo INDONÉSIA TIMUR mah, jauh pisan bédana téh.

Di INDONÉSIA TENGAH jeung TIMUR mah lamun aya kapal laut berlabuh téh, anu pangheulana ditanyakeun téh, bawa apa kapal?. Lamun bawa béras, saprovinsi masarakatna téh barungaheun. Tapi lamun mawa nu séjén misalna tekstil jeung sajabana, ih da maronyong wé persis aseupan butut anu geus jalabrig pinuh ku ramat lancah téa.

Bérés ngalaksanakeun DWIKORA di KODAM IX MULAWARMAN téa, kabeneran harita téh LIKWIDASI, kembali ke induk pasukan semula, aya surat ti EMA. Amanatna téh “Eureun cenah di Héjo téh”, Ema geus kolot. Gawé jadi UMAR BAKRI deui, rék di SR/SD, rék di SMP, rék di SMA, ku Ema mo burung dikojayan cenah. Maklum alam harita mah béda jeung kiwari, kiwari mah aya OTDA-OTDAAN sagala, kumaha aing, kerajaan-kerajaan kecil téa. Jawaban kuring tetep hayang jadi GURU SR/SD baé, padahal harita téh lamun tetep di Héjo pangkat téh geus PERWIRA.

Satutasna ngalaksanakeun DWIKORA téa taun 1966, kuring balik deui ka kantor Inprasarlub di Kabupatén Bekasi. Taun 1970-an pindah gawé téh ka Kabupatén Purwakarta. Ngajar di SD Lapang Pori/Pekan Olahraga Republik Indonésia isuk-isuk, beurangna di 5 SMA, SMAN 1, SMA PGRI 1, SMA Pasundan, SMAN 1 Sukatani jeung SMK Muhamadiyah. Ngajar NON-FORMAL PRAMUKA jeung PMR, FORMAL na FISIKA jeung KIMIA (Téma Musik jeung Karawitan), nepika taun 2000.

Ti taun 1970-an kénéh, tiap lima taun sakali kuring ku komandan ditawaran jadi Kepala SD, ditolak baé. Alésan rupa-rupa (moal dicaritakeun didieu da rahasiah perusahaan).

Dina taun 1995 mah kuring dipaksa ku komandan sina jadi Penilik Kebudayaan, Penelik Generasi Muda, Penilik Olahraga, jeung Penilik Masyarakat, sabab ti GURU ogé bisa kanu kitu mah, kajaba Penilik TK/SD, kudu ngaliwatan jadi Kepala SD heula. Nya kuring milih jadi Penilik Kebudayaan.

Cekeng téh, heug jadi penilik tapi moal maké DUIT da teu gableg... Naaaa da éta mah, ari testing penilik lulus, ari BISLUIT/SK Pensiun datang, jero haté ceuk Aing ogé embung, teu tulus... tadi téa sudah suratan.

Ti taun 2000 pangsiun téh tina salaku GURU SD téa nepika kiwari. Tanggal 29 Nopember 2000, dina baligho dikantor KODIM 0619 PURWAKARTA aya pangumuman, kepada mantan-mantan TRIKORA/DWIKORA dan SEROJA kudu ngumpulkeun data-data, piagam-piagam dan lain sebagainya cenah.

Kuring atoh kacida, deker wéh digarap, dikirimkeun ka KODIM. Sataun, lima taun, nepika tujuh belas taun euweuh waé beritana, bahkan hilang cenah. Salaku prajurit kuring ambek tapi seuri, ITULAH INDONÉSIA...

Geus kitu kuduna meureun, kulantaran rajin trampil end happy, deker deui digarap da aya arsip téa. Otomatis waragad nambahan, da éta waé ngarental mobil ogé nepika 27 kali.

Pitulung Alloh SWT tadi téa sudah suratan, dina tanggal 27 Nopember 2019 sagala persyaratan-persyaratan TRIKORA/DWIKORA téh car lancar rés bérés ta ieu, hasil perjuangan téh. Hal ieu sakabéhna berkat ti Alloh SWT, ogé gawé bareng nu rancagé antara stake holder, hususnna ti kantor MINVET, nyaéta KAPTEN HÉRYAWAN, KAPTEN WAWAN jeung SERDA SAEPUL.

Saterusna kuring meunang piagam Tanda Kehormatan ti MENTERI PERTAHANAN DAN KEAMANAN RI, nyaéta mangrupa TANDA KEHORMATAN VETERAN PEMBELA KEMERDEKAAN RI (TRIKORA/DWIKORA). Teu cukup ku kitu sakaligus deuih meunang KARIPNA, lazimna pangsiunan baé nu tiap bulan dicokot di BRI, teu, teu ATM-ATM-man, da teu kadeuleu, mendingan maké rekening BANK waé itung-itung reunian baé atawa together-an.

Méh baé kaliwat, tadi téa méméh pangsiun sagala dipigawé, lain PAW-PAW-an / Pergantian Antar Wakktu, tapi nu diatas sana perlueun jeung nempoeun sugan. Kayaning dikantor DINAS PENDIDIKAN, Pengurus PMI, Pelatih Pembina PRAMUKA anu pamungkas mah Pengurus Déwan Harian Cabang Badan Pembudayaan Kejuangan 45 (DHC BPK 45) Kabupatén Purwakarta BIRO HANKAM periodeu 2020 – 2025.

Dina umur anu geus magrib masih kénéh bisa ngabaktikeun diri ka bangsa jeung nagara, tadi téa keur conto nu alusna pikeun generasi muda téa. Ogé tadi téa abong-abong resep kana KEPANDUAN / KEPRAMUKAAN hiji diantarana kudu hemat cermat dan bersahaja cenah.

Éta wéh padumukan téh dijalan PRAMUKA pisan, hésé apan batur mah. Katuliskeun jurig, da tadi téa hemat cermat, nepika ompong sagalana, teuing lamun jujur teuing sugan. Éta wéh imah ogé ti kikirik nepi ka jadi anjing, ti ngungkuak tepi ka ngungkueuk, éstuning ngontrak jeung ngontrak baé. Bari mindeng MUTASI éta téh, da diusir téa, da teu kabaray jeung sajabana wéh, duh diri.

Dina hal ieu lain hirup royal lain, éstuning ceuk rumus para pelatih pembina pramuka mah anu dina dadana pinuh ku rupa-rupa kaléng nanahaon mah, kieu : sudah suratan, beunghar tadina, meunang warisan, bisa usahana, béh dituna ditambahan ku korupsi, muja jeung togel. Lain, sakali deui lain royal tadi téa sudah suratan meureun ompong salagana. Da ari digawé mah rumasa prajurit téa, datang pangheulana balik pangpandeurina téh lain bobohongan.

Darajat Tisnawijaya kenging layang pangajen ti Kwarnas 2019 PANCAWARSA UTAMA.*

Atuh dina taun 2019 keur HUT PRAMUKA SA-JABAR di Kabupaten BOGOR, kuring meunang Hadiah ti KWARNAS ngaranna téh PANCAWARSA UTAMA, éta téh sa-Indonésia ngan hiji-hijina kuring téa. Dina 27 Nopember 2019 tadi téa Tanda Kehormatan Veteran Pembela Kemerdekan TRIKORA/DWIKORA ti MENHANKAM, ieu ogé sa-Indonésia ngan kuring doang.

Nepi ka di Kantor KODIM mah kuring ceurik ngagukguk. Teu arék kitu kumaha, lima puluh genep taun kalarung kuring saparakanca bajoang, kari-kari kiwari aya penghargaan ti nagara anu mangrupa surat salambar, duit tiap bulan nu jumlahna Rp. 1.813.000,- Dina hal ieu Kepala Dinas Pendidikan ogé Kemenag Kabupatén Purwakarta ogé aruningaeun da kuring laporan, katambah duanana murid pisan, lucu nya?

Pamungkas ti kuring : ”Dina hal ieu kieu-kieu ogé kuring téh jelema sésa perang, sésa pelor, mangkaning tadi téa sa-Indonésia téh ngan hiji-hijina téa, sabab babaturan mah geus kamarana boa, ceuk urang Bekasih mah pada pulang kagak balik lagi”, tah nu matak ngagukguk dikantor KODIM téh.

Pertanyaanana :

1. Bukan betul salah, bukan menjodohkan, bukan pilihan ganda, tetapi essey.

2. Kuring téh dina taun 2019 téh bener-bener ngajaga nama baik Purwakarta Istimewa/Wibawa Karta Raharja, sakaligus GEMAH RIPAH REPEH RAPIH/JAWA BARAT. Kumaha tanggapan ti BUPATI PURWAKARTA ogé ti GUBERNUR JAWA BARAT, dina hal ieu ti Rd. Hj. Anne Ratna Mustika, SE katut ti RIDWAN KAMIL???

Nepika wayah keiu teu kadengé naon-naon. Malah dina HUT GERAKAN PRAMUKA ka-59 taun 2020 Tingkat Kabupatén Purwakarta ogé di Maya Datar teu di taro teu di takon, boro-boro diondang, komo méré imah type 60 mah.

Reference : Boro-boro ngundeur asih anu ngarangkulan, kalayan dipasieuk ku manggih imut dina lahunan, nu jelas mah ahirna kiwari tinggal waasna, ligar dina panineungan.

Abong-abong ka nu sukarela, abong-abong kanu sésa perang, abong-abong kanu sésa pelor, abong-abong kanu ompong sagalana, duh diri... ***

Pasisian Jatiluhur, 20 Oktober 2020

Darajat Tisnawijaya

“Mapag Hari Pahlawan, keur para pahlawan anu pandeuri”.*

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: