Carpon : “GETETE” Ku : Darajat Tisnawijaya

 

Carpon :

“GETETE”

Ku : Darajat Tisnawijaya

"....Lucuna ari anak buah kuring guru-guru téa, teuing kumaha, jiga anu ngartikeun saban kuring keur paduduaan, komo keur ngahuapan mah..."

R

umah tangga kuring jeung manéhna téh cukup lila, layeut, ceuk batur mah nurub cupu cenah. Sok sanajan kaayaan ekonomi mah bisa disebut pas-pasan. Lain bobohongan, maklum kuring mah pagawé leutik, kasang tukang salaku kepala sekolah di hiji SD. Anu leuwih reueus deui mah pamajikan pisan, teu aya aral subaha téh, rido bari jeung weleh ngingiclik baé kaditu-kadieu téh, ceuk budak ngora mah meureun “lengket kayak nomer HP”. Nyaéta ogé ari sautak-saeutik mah gangguan tehnik téh aya, maklum pasipatan manusa anu kurang sampurna téa.

Geus puguh ari arogoannana anak buah mah, boh sacara pribadi boh sacara dines. Maklum kaanak buah téh kuring mah terbuka, blak-blakan dina sagala rupa téh. Sering pisan lamun anak buah teu hadir kuring sok ngeusian kelas, maksudna mah nyelangan ngajar. Dicaritakeun lain nanaon, pedah wé inget kana tanggungjawab jeung kadisiplinan baé. Da naon deui atuh di alam dunya mah, pikeun kuring kitu ogé, itung-itung hayang pepelakan baé anu hadé pikeun sampeureun engké jaga.

Dina hiji waktu, guru kelas 4 teu datang, malah teu béja teu carita. Sedengkeun ari guru kelas 4 téh nyaéta guru tidak tetap alias honorér alias GTT téa. Budak kénéh alias gadis, rajin pisan dina sagala pagawéan téh. Malah anu anéh téh teu dipiceun sasieur jeung pamajikan téh, éstuning kawas jambé dibeulah dua.

Harita kelas 4 téh ku kuring tadi téa nyelangan ngajar, nyaéta dina pelajaran kasenian/ngawih. Deker baé kuring téh ngajar, ongkoh tambah cangkeul, kabeneran kuring rinéh, maklum goréng-goréng ogé kuring téh pingpinan. Sihoréng salila dua jam pelajaran kasenian téh, anak buah kuring GTT téa téh aya, ngan sigana arek asup ngajar téh kagokeun, béh dituna dijalanna macet meureun.

Sabot kitu Bapa Pengawas sumping, saterusna anu narima Bapa Pengawas téh nya anak buah kuring anu GTT téa, anu héjo kénéh pangalamanana. Geus kitu kuduna meureun, Bapa Pengawas téh ngalér-ngidul sagala ditanyakeun, nepika hal-hal pribadina ogé tetelepek ditanyakeun, bari jeung over akting sagala, maklum Bapa Pengawas téh duda tur beunghar. Nyaho sotéh guru kelas 4 GTT téa laporan, bari ceurik sabada Bapa Pengawas mulih. Tidituna mah mangadu meureun, bakating ku geus teu asa-asa téa ka kuring.

Samulihna Bapa Pengawas, kuring jeung anak buah nyaéta guru-guru katut penjaga, rapat leutik heula. Ngabahas naon-naon anu didugikeun ku Bapa Pengawas, kayaning ngeunaan pentingna dunya atikan, komo dina era globalisasi, pang-pangna dina nyanghareupan kurikulum anu anyar cekeng téh.

Rengsé ngayakeun rapat, anak buah marulang ngan penjaga baé anu pangpandeurina balik téh. Da kitu meureun geus ilahar ari penjaga mah, datang pangheulana balik pangpandeurina dimana-mana ogé. Sakapeung mah sok era ku penjaga téh, mun sakabéh PNS pangpangna para pajabat, disiplinna kawas penjaga, sigana beres meureun ieu NKRI téh, moal, moal aya anu dicérék ku KPK, moal-moal acan aya KPK ogé da tadi téa disiplin.

Teu karasa jam geus nuduhkeun tabuh 15.00 WIB, lila pisan geuning kuring cumeluk nyorangan di kantor téh. Maké jeung mukaan biodata Si GTT téa sagala, nepika sababaraha kali diilo, padahal manéhna téh geus lila ngajarna téh. Geus kitu kuduna meureun, teuing aya rasa nanahaon, sakali deui disebut anyar da geus lila ngajarna téh. Ngan jelas ari umurna mah jauh pisan jeung kuring téh, bédana ogé 35 taun. Ari nu hayang seurina mah lamun kuring dikantor nyorangan, teu bosen-bosen éta biodata téh dibukaan deui. Malah dina hiji waktu mah ampir-ampiran kaeraan ku guru-guru téh, ngan berkah aya ide, gancang ditutupan ku map séjén, heuheuy deudeuh, asa era mikirian kalakuan mangsa harita.

Geus kitu kuduna meureun, dina umur kuring nincak kana 58 taunnan, pamajikan téh dipundut ku Nu Kawasa, alatan katarajang jantung ceuk dokter mah. Mangkaning tadi téa, keur reugreug pageuh rumah tangga, kari-kari sakaligus ditinggalkeun. Kacipta kumaha sedihna kuring jaman harita dina sagalana, katambah-tambah nepika harita kuring téh acan dibere pisan turunan.

Teu karasa waktu nyerelek, kuring angger ngalaksanakeun tugas sakumaha biasa, pon kitu deui guru-guru katut penjaga.

Dina hiji waktu GTT anak buah kuring téa gering, malah nepika diopname sagala. Ari kuring da salaku komandan téa, unggal poé ngalongokan ka rumah sakit téh, katambah-tambah manéhna téh geus yatim piatu. Saha deui iwal ti kuring ogé guru-guru anu mikanya’ahna téh.

Lucuna ari anak buah kuring guru-guru téa, teuing kumaha, jiga anu ngartikeun saban kuring keur paduduaan, komo keur ngahuapan mah, sok nyaringkah, alesanana rupa-rupa, maklum S1 malah S2 anak buah téh. Tapi ari palebah pamitan téh deui-deui lucu, mani kompak persis anu keur rampak sekar.

Pareng dina hiji waktu pisapoéun deui balik ti rumah sakit, bét aya rasa anu béda sajeroning ngobrol téh. Lain wungkul mapagahan anu aya patalina jeung kadinesan, tapi leuwih jauh ngobrol kana masalah pribadi sagala. Meureun ceuk barudak ngora kiwari mah “mengeluarkan isi hati ungkapan rasa”, curhat téa. Teu kalis bari jeung luak-lieuk sieun aya nu ngintip, geus puguh haruwas-harewos mah. Mana komo basa keur ngedalkeun naon anu disebut eusi haté, yén ...... kuring téh nya’ah kamanéhna téh, tresna, jeung sajabana wéh. Éta téh bari jeung teu karasa cipanon murubut, inget ka sijenak anu sakitu belana basa keur masih aya dikieuna. Ditambahan ku rasa era, sieun ditolak cinta tur ku anak buah pisan. Ari teu dikedalkeun bisi ku Pengawas manten, jaba pengawas mah beunghar deui, pangkat jeung jabatanna, ogé golongannana leuwih luhur, ari arek kikieun piraku baé.

Dina simpena peuting di rumah sakit téa harita, teu disangka-sangka anak buah kuring anu masih kénéh ngora téa téh ngaharewos : “Upami Bapa nya’ah ka abdi, sing sapertos Bapa nya’ah ka Ibu almarhumah, istri Bapa cenah.” Mangga téh teuing badé iraha-iraha ogé abdi badé ditikah ku Bapa, da saleresna abdi ogé .... teu kebat manéhna neruskeun caritaannana, ngan anu jelas mah gabrug baé kukuring ditangkeup, dikeukeupan, bari rasa pinuh ku kabungah ngadengé caritaan nyi mojang GTT téa.

Teu karasa pas umur kuring nincak kana 60 taun, dina harti sakedeung deui kana pangsiun, kuring ngalaman nyorang deui ka bale nyungcung jeung manéhna GTT anak buah kuring, guru kelas 4 téa.***            

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: