Tilu Golongan Jalma nu Meunang Rahmat jeung Magfirah Allah - Ku : Abah Dedi
Poé ieu, syukur, alhamdulillah,
urang ditepungkeun deui sareng Idulfitri. Hiji poé nu pinuh ku barokah. Poé
panutup perjuangan muslimin-muslimat dina raraga ngudag prêdikat mutakin.
Mun ngudag kana hakékatna, teu
sakabéh jalma meunang kabagjaan dina poê lebaran Idulfitri lantaran teu walatra
meunang rahmat jeung magfirah Allah. Tah, jalma nu bagja dina poé lebaran
Idulfitri téh, nyaéta nu meunang rahmat jeung magfirah-Na.
Aya tilu golongan, jalma nu
meunang rahmat jeung magfirah Allah dina poé lebaran Idulfitri, nyaéta:
1. Jalma nu ménta pangampura
jeung ngahampura papada jalma. Naha kudu ménta pangampura? Pan urang salaku
manusa teu leupas tina kakurangan jeung kasalahan. Ulah ngarasa diri teu boga
dosa ka papada. Yakin, manusa mah pasti. Ogé urang wajib ngahampura papada
jalma. Pan urang apal, Allah Maha Pangampura. Atuh mun kitu mah, urang kudu
pisan ngahampura kasalahan papada jalma.
Dosa ka papada jalma teu bisa
ditebus ku tobat atawa istigfar ka Allah. Allah moal ngahampura jalma nu masih
kénéh boga dosa ka papada jalma.
2. Jalma nu mikanyaah
indung-bapana. Mikanyaah jeung mikacinta indung-bapa wajib saparantos mikanyaah
jeung mikacinta Allah jeung rasul-Na. Rido Allah aya dina rido kolot urang,
bebendon Allah aya dina bebendonna. Salila can meunang rido jeung pangampura
kolot urang, urang moal matak meunang rido jeung pangampura Allah.
3. Jalma nu rutin nyieun poé
ayeuna leuwih hadé tibatan poé kamari. Naha? Pan jalma nu kitu mah cirining
éra, ajrih, jeung sieun ku Allah nepi ka unggal waktu ngoméan kalakuan hirupna.
Diimeutan kakurangan diri, terus dioméan nepi ka unggal waktu kiwari leuwih
hadé ti bihari. Allah mikaresep jeung mikanyaah jalma nu kitu.
Cag, ah! Yu, urang tengetan, naha
diri urang kaasup nu meunang rahmat jeung magfirah Allah dina poé lebaran
Idulfitri atawa meunang bebendon-Na?
#hikmahidulfitri_240520
0 Response to "Tilu Golongan Jalma nu Meunang Rahmat jeung Magfirah Allah - Ku : Abah Dedi"
Posting Komentar