Islam teu Ngabeuratkeun
|
S |
aéstuna, Islam mah teu ngabeuratkeun ka nu ngagemna. Sanajan tugas jalma ngan saukur ibadah tapi tetep Allah teu ngabeuratkeun. Da Allah mah nitah urang ibadah téh luyu jeung kamampuhan tur kaimanan urang.
Malah
dina prak-prakanana, Islam loba méré karinganan jeung kaénténgan dina ibadah. Hartina, ibadah/amalanana énténg
tapi pahalana sakitu rongkahna.
Naon waé ibadah/amalan nu kitu téh? Di
antara:
1. Maca surah Al-Ikhlas bakal meunang istana di sawarga, sakumaha
kaunggel dina hadis, “Sing saha jalma nu maca
qulhuwallahu ahad nepi ka tamat (Alihlas) sapuluh kali mangka éta jalma
dipangwangunkeun istana di sawarga.” (H.R. Ahmad).
2. Maca tasbih bakal nambahan timbangan
hisab, sakumaha kaunggel dina hadis, “Dua kalimah nu énténg diucapkeun tapi beurat dina
timbangan nyaéta "subhanallah wabihamdihi, subhanallahal aziim." (H.R.
Muslim).
3. Maca istigfar matak dijembarkeun haté,
sakumaha nu kaunggel dina hadis, “Sing saha jalma nu loba
maca istigfar mangka Allah bakal méré kabagjaan tina unggal kasedihna, méré
kajembaran tina unggal karupekna, jeung méré rejeki ti nu teu sangka-sangka.” (H.R.
Abu Daud, Ibnu Majjah, jeung Ahmad).
4. Maca salawat matak meunang rahmat
Allah, sakumaha nu kaunggel dina hadis, “Sing saha umat kami nu maca salawat ka kami sakali
mangka Allah bakal méré rahmat-Na sapuluh kali.” (H.R. Muslim).
5. Maca lahaula matak jadi cêngcélêngan
pahala di sawarga, sakumaha kaunggel dina hadis, “Wahai Abdullah bin Qais, ucapkeun ku anjeun
kalimah "lahaula wala quwwata illa billahil aliyyilaziim" lantaran
bakal jadi céngcéléngan pahala pikeun anjeun di sawarga.” (H.R. Bukhari).
Mun
ditengetan, éta pagawéan/ucapan téh énténg kacida. Dina témpo memenitan, urang
bisa ngucapkeun puluhan malah ratusan kali. Hartina, dina témpo anu heureut,
urang bisa ngaborong pahala nu rongkah jeung rohaka. Asa piraku mun urang teu
kabita jeung teu bisa migawéna.***
#abahdedi_210520
0 Response to "Islam teu Ngabeuratkeun"
Posting Komentar