Warta Pustaka Sunda - Koleksi

#NetDiariRomadonan2019
#Net_IM(11)

ku Ida Mindawati 

P

oé ka sabelas bulan Romadon.Naon nya nu rék diguar poé ieu? Pang-pangna mah pedaran téh kudu nyambung kana téma, sedengkeun bahan nu rék dicaritakeunana ogé geus korédas, lebeng, poékeun teu aya ide. Ngabahas olahan ajang buka waé kitu? Keun wé balad Pustaka Sunda bosenen ogé, nu utamana mah ngotrét wé unggal poé.
Nya kumaha deui atuh da bulan puasa mah nu dicatur téh pasti waé hal tarawéh, tadarus, dulag, saur, imsak, ngabeubeurang, ngabuburit, jeing kagiatan lainna nu aya patalina jeung bulan puasa.

Olahan ajang buka poé ieu mah ngaloték, goréng tahu, lauk asin tangiri, kurupuk, sakitu gé cukup, ajang janari mah kumaha bréhna wé.
Anu amis-amisna aya kuéh papais pangirim ti Ceu Dede Sutini tatangga gigireun pisan.Ari bubuahanana mah cau-cau waé mah aya, disaluyukeun jeung eusi pésak lain teu hayang nu aralus, dina  raraga ngirit malum tengah bulan.
Ari umur tos tunggang gunung mah kudu ngautamakeun sayuran jeung bubushan ambéh séhat henteu ririwit.

Cag heula badé siap -siap buka.***

#netDiariRomadonan2019
#ponparpoéka8

T

iap tos Subuh siap ka Masjid Agung Sukamantri rék kuliah Subuh, karék mukakeun panto aya pangumuman ti Masjid Agung, yén aya nu mulih ka rohmatullah Jang Ayi putrana Bapa Juha.

Sabérésna kuliah Subuh, bring saréréa takziah atawa ngalayad nu ngantunkeun téa.pangna dicaritakeun didieu téh, duméh nu ngantunkeun teh aya sangkut paut jeung PEMILU téa.

Ieu budak téh umurna karék 22 taun, bujangan kénéh malah sadidinten mah damel di Bumdes Sukamantri, budakna bageur, pikaresepeun, matak nineung pikeun sobat-sobatna.
Namina Ayi duka nami aslina da nyebat mah Ayi, putra  Mang Juha sareng Bi Ati, budak bageur pisan nyaah ka kolot.

Waktu kamari PEMILU téh,Ayi jadi Panwas,harita keur teu pati jagjag, gaduh panyawat lambung, eukeur mah teu pati jagjag   dituluykeun gawé durpur  nya  janten nambru, dugi ka dirawat di RS Dadi Keluarga di Ciamis, kenging saminggu di opnameu terasna dicandak wangsul deui ka lembur, di lembur lain cageur mingkin ripuh dugi ka ajalna di Puskesmas Sukamantri .
Malahan mah kamari waktos pupusna, nu ngalayad seueur pisan ti panwas sareng rérencangan nu damel waktos Pemilu,oge réréncangan nuju SMP .

Inalilllahi wainna'illaihi rojiun, Ayi mugi ditampi Iman Islamna, dicaangkeun dialam kuburna,mugia husnul khotimah, nu dikantun ibu ramana sing dipasihan kasabaran
Aamiin.***
Cag ah

#NetNgabuburit2019
#NetEdoy_TTg

BUAH KÉRSEN

I

nget keur budak, mun bulan puasa téh sok ngala kérsen hareupeun sakolaan SD. Teu jiga ayeuna, harita (taun '60) mah hayang tajil ku bubuahan téh hésé. Di kampung ongkoh (+/- 50 km ti Tasik ka kidul), euweuh nu dagang bubuahan, komo korma mah. Nya kérsen jadi pavorit tajil barudak harita.

Ayeuna, geus aki-aki, deukeut imah aya tangkal kérsen. Ceuk batur buah kérsen téh loba mangpaatna. Nanyakeun ka Mbah Google, enya cenah. Mangpaatna téh aya  tujuh rupa :
1. Sumber antibiotik alami, ngabogaan 'senyawa antibakteri' anu kuat.
2. Beunghar ku vitamin C,  tina 100 gram buah kérsen miboga 150 miligram vit. C.
3. Ngurangan nyeri incok, ngadahar 9 - 12 siki buah kérsen 3 kali sapoé, bakal ngurangan rasa nyeri incok/asam urat.
4. Ngareuhreuykeun rieut, buah kérsen bisa 'merelaksasi pembuluh darah' nepi ka getih bisa sumebar dina awak kalawan normal.
5. Alus keur nu boga kasakit diabétés, sanaja amis, buah kérsen bisa nurunkeun 'kadar gula', ngurangan nginum ubar.
6. Miboga antioksidan anu 'kadarnya tinggi'. Antioksidan téh 'kandungan' nu pancénna .nguatkeun sistem imun awak ngalawan 'radikal bébas' nu bisa ngalantarankeun kanker.
7. Ngandung nutrisi penting saperti 'serat', 'karbohidrat', 'protéin', 'kalsium', 'fosfor', 'zat besi' jeung vitamin B.

Naha bener buah kérsen nu ku urang sok disapirakeun téh hébat? Wallahu'alam. Nu pasti mah, hiji-hijina buah nu haratis, nu aya deukeut imah, buah kérsen. Jadi siga baheula keur budak, ngabuburit ngala kérsen!
(potrét dok. pribadi).***

#Nét_Diari_Romadon_2019
   #Nét_Carita_Ai_Wawang

Lauk Situ Jatigedé

Wado, 14 Mei 2019

T

i Malébér ngebat ngalér. Haté téh teuing ku sebér. Mapayan carita lawas. Katineung na saban léngkah. Kateuneung teuing di mendi. Ngan kakeueung marengan dina rénghap jeroeun dada, nu ratug nempoan ruruntuk panganjrekan.

Balad, PS. Malébér geus lila salin jinis. Babantar talaga di lebah Tugu Wado, ramé pada ngajugjug. Nu ngadon ulin waé, nu ngahaja datang rék meuli lauk ti mana-mana. Atuh saung-saung nu dagang dahareun keur buka gé loba.
Ari kuring, mangkat ti imah téa mah, rék ngadon COD. Aya sababaraha potong baju nu ngahaja rék dianteurkeun. Sapanjaang jalan, ti Kebon Tiwu kénéh basa ngaliwat imah mitoha, haté jol ngenes. Imah nu basa oléng pangantén kuring kungsi nyicingan. Diajar masak, diajar sagala kahirupan rumah tangga. Ka dieunakeun kungsi kuring muka pangkalan kusén jeung mébeler di dinya pisan. Cimata nyalangkung, teu kabendung. Ujug-ujug kakangen nganteng ka Aki almarhum nu sok nyetél radio tarik nakeran. Sorana balap jeung gerungna patalimarga nu teu eureun najan peuting.

Labas, liwat Pangantingan, nempo runggunukna sawah Cibodas nu baréto kungsi kuring sok miluan bebelesekan molah. Waas. Asa hayang nyawah deui. Asa resep botram dina iuh-iuh tangkal randu. 

Liwat Jambatan, haté kelar nempo jalma noyék maridang. Rumaja sumedeng ligar mah teu éra ocon jeung papadana bari sésélpian. Haliwu, campuh jeung pagaliwotana kuda tunggang sarta kakarétaan. Barudak saruka bungah. Indung bapana sarua katawis saroméah. 

Méngkol ngatuhu. Malébér labas ka tugu. Asa tambuh laku, rék naon kuring ka dieu. Ber asa kabawa ku suasana haté nu juuh ku panineungan.
Parahu, parahu pamayang. Kiwari urang dieu jadi pamayang. Saprak sawah léndona kakarem cai talaga. 

Nu dagang lauk. Enya lauk talaga. Kuring nyampeurkeun pamayang nu karék hanjat. Dagangna dina parahu. Atun mokaha, nanyakeun harga téh kudu bari ngagorowok. "Mang, aya lauk naon?"

"Jaér sareng patin, Bu!" Témbalna. Kuring meuli patin sakilo. Jaer mah henteu da arageung teuing. Gila nempona. Nu dagang laladang sabari jigrah. Ngala laukna beubeunangan loba. Haté muji sukur ka Nu Kawasa. Pangupa jiwa, najan baganti carana, Pangéran mawurkeun rijikiNa di mamana. Teu aya sawah, ngajemplang situ. 

Satutas balanja. Inget waktuna buka sakedap deui. Motor ngabiur ninggalkeun katineung. Kakangen mah tetep nganteng. Dina mémori moal leungit carita bihari. Najan kiwari geus baganti. Lemah cai, mugia waluya.***

#NetDiariRomadonan2019
#NetEdoy_Tgr

RUNTAH KAI

Potrét dok. pribadi)

L

amun urang ulin ka pabrik kai atawa pabrik mébel, urang bakal manggihan runtah mangrupa popotokan jeung tai ragaji. Keur pabrik, geus taya gunana. Duruk? Ké heula. Popotokan bisa diolah jadi barang nu hargana mahal, sanajan aya saratna. Saratna téh :
1. Boga kaahlian husus, utamana ngolah kai;
2. Boga kamampuh jeung kréativitas pikeun ngarobah runtah jadi karya seni;
3. Kréatif nyieun modél anyar nu bisa ngirut ati masarakat pikeun meuli nepi ka ngabajong;
4. Hasil karya inovatif nu geus jadi kudu dipromosikeun supaya masarakat nyaho.

Tina popotokan bisa dijieun barang seni saperti miniatur mobil, miniatur motor, miniatur imah, catur, bonéka karakter, pajangan, lukisan 3 diménsi nepi ka érloji.

Tai ragaji bisa dimangpaatkeun pikeun bahan nyieun batako, ampar kandang hamster, média pepelakan, brikét, jsb.***

Edoy Suhendar

(Tangerang, 150519-10

Potrét dok. pribadi)

Kantong balanja
Weweg moal ngajebrol
Ema baheula

"Néng, urang ka pasar, yu! Tabuh duaan ngajak si bungsu. Inget di dapur teu gaduh nanaon keur buka.
"Asyik, badé ngagaleuh naon, Mah?"
Mésér waluh, leunca sareng oncom,"
"Hayu!" Budak giak. Atoheun pisan pami diajak balanja téh. Sok ngaréwong barangpésér.
"Kedap nyandak tas heula!" Ka tukang ngabantun tas jingjing. Tas jingjing ieu téh kénging pamasihan ti pun lanceuk di Subang. Di ditu mah upami hajat tujuhna, matangpuluh atanapi mendak sok ngawadahan sangu, lauk sareng kuéh kanggo nu tahlil kana ieu tas minangka tiblekna.

Alhamdulillah balanja téh teu seueur kénging kérésék da langsung diabuskeun kana wadah. Gampil nyantélkeun kana motor deuih, beurat gé teu sieun nyajebrol.

"Teu isin kitu, Mah, ka pasar nyandak kantong kitu? Jiga Ema baheula waé!" Bapana budak nanya waktu ningalieun kuring ngajingjing balanjaan.
"Naha bet isin? Pan Mamah gé Ema!".***

Nenden Hernika

#NetDiariRomadonan2019
#Carita_NH
14-05-2019

#Nét_YansPost
#Nét_PadusUnpad2019.

S

ok sanajan leuir pisan, sabab aya kagiatan nu pinuh pisan di sakola boh di luar sakola, karék tiasa kaapungkeun ieu kotrétan.

Bagja jeung reueus pagaliwota. Teu kaampeuh cimata juuh.
Nempo nu jadi anak, nyatana Si Cikal Azzahra Febriana, magelaran anu munggaran ti kampusna. Miluan kagiatan Paduan Suara Mahasiswa, dijadualkeun seja ngayakeun konsér ka 14 PSM, anu tempatna di Graha Sanusi Hardjadinata Dipati Ukur.

Latihan ti bulan Januari mula. Paselang jeung waktuna kuliah. Atuh balik ka imah téh langka kurang ti tengah peuting.

Munajat ka nu kawasa, muga disalametkeun dina mangsa kudu nohonan waktu latihan. Teu nyaho hujan sumawona hawa nu panas. Tigin latihan.

Poé nu dianti teu burung cunduk. Poé Saptu, Ping 27 April 2019, pukul 19.00 WIB, acara di mimitian.

Subhanalloh...
Ukur bisa ngucap syukur ka Alloh SWT.
Bagja bisa nungkulan budak.
Mentas munggaran di gedong agréng.
Reueus kacida...

- Lagu Internasional.
- Lagu Daerah Nasional.
- Lagu Daerah Internasional.
- Lagu Populér Internasional.

Kapidangkeun kalayan meunang aplaus ti nu nongton.
Spéktakulér...
Komposisi vokal nu luar biasa.
Acara lekasan pukul 22.30 WIB.
Asa sakerejep.
Teu karasa.
Wilujeng anaking.
Kanyaah bapa jeung kulawarga.

Bandung 12052019.

Yana Sopyana

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: