Kamandang : Atep Kurnia ( Wilujeng Poé Buruh, Lur! )
Wilujeng Poé Buruh, Lur!
|
A
|
yeuna téh tanggal 1 Méi.
Unggal tanggal éta kuring, sok ras ka jaman digawé di pabrik antara 1998-2006.
Harita, kangaranan hirup kumbuh sasama buruh, nya gaul gé teu jauh ti dinya. Nu
matak réa nu meunang jodo ogé nya ku lantaran cinta lokasi téa. Sasama kuli
pabrik, lantaran sasat ulukutek guk-gok di dinya. Najan enya, digawéna mah ngan
8 jam dina sapopoéna téh. Tapi da ku lantaran remen tepung téa meureun.
Di luar
pagawéan, sok aya waé acara dijieun keur ririungan, manjangkeun tali
silaturahmi. Cara sakali mangsa kungsi ulin babarengan ka Jakarta, ngadon
ngadongdon Ancol téa. Atawa cara nu kagambar dina potrét, ngadon papasakan di
imah salasaurang babaturan di pabrik. Harita téh asana, tas mulang digawé
peuting. Ngan poho deui, naha harita téh torojogan atawa ngahaja-haja meunang
ngararancang méméhna. Nu jelas, bring waéh diluluguan ku Kepala Shift Persiapan
Pa Giyanto jeung Kepala Shift Weaving Pa Muksin, muru ka Cikancung. Ka imahna
Néng (poho deui ngaran lengkepna mah) di Cihanyir.
Méméh
ngahékak sangu ngebul katut deungeunna, der dibubukaan sarta didoaan heula.
Dipingpin ku Pa Giyanto. Ari ngalimedna mah di sisi balong nu turut sisina
dipelakan paré. Kuring mah kabagéan amparan bilik atawa giribig, keur diuk téh.
Babaturan mah ngadon naragog cingogo. Leungeun kénca nanggeuy piring. Saréréa
cetaan nu sibuk bari cicing téa, saur Kang Hawé mah.
Ayeuna geus
kalarung 13 taun leuwih. Tapi da pangalaman digawé di pabrik téh bakal angger
jadi dedek angen-angen kuring. Samalah jadi salasahiji pangalaman hirup anu
ajénan pisan. Lantaran, nya dina mangsa harita “mohona” pisan kana maca téh.
Kaharti, lantaran harita mah, da geus boga waragad keur meuli buku. Najan
unggal minggu, mun pareng gawé peuting, sok maksakeun manéh miang ka
Bandung. Ngadon barangsiar bacaeun ari aya luang ti antara ngajaga mesin
mihané.
Da enya,
harita mah acan pabeulit pisan corak benang nu kudu digulung téh. Teu pati capi
kudu nyambung-nyambung benang nu paregat, lantaran prosés tina mesin
“Sizing”-na teu pati lancar. Teu pajeujeut teuing kudu ngomé lusi tambahan anu
warna-warni téa. Beulat-beulit jeung warna emas atau pérak. Jadi rada antaré
digawé téh. Unggal tina ngagulung benang kira 3000-6000 méter nu nyongcay waktu
kira 2 jam, sok aya lolongkrang pikeun ngadeluk maca, ngadon méakkeun
kapanasaran kana novel-novel sastra, boh karya asli Sunda atawa Indonésia boh
nu tarjamahan. Bari teu pati teuing karasa digawé téh. Nu matak, salian sangu
dina tépak, sok aya baé buku nu dibekel ka pabrik téh.
Ayeuna najan
geus ganti pileumpangan, haté mah angger ngait ka pabrik nu baheula. Da
babaturan, cénah mah masih aya digarawé di dinya, najan ku rupaning aturan, teu
bisa boga status nu jinek cara baheula. Lantaran jadi outsourcing téa, teu lila
ti barang kuring kaluar. Nya, inget ka dinya, nu matak ayeuna kuring hayang
pisan mulangkeun panineungan sarta ngawilujengkeun ka babaturan saperjoangan.
Wilujeng poé buruh, Lur!
Cisalatri, 1 Méi 2019
0 Response to "Kamandang : Atep Kurnia ( Wilujeng Poé Buruh, Lur! )"
Posting Komentar