FIKMIN BASA SUNNDA- #Ai Wawang - Hadiah Istiméwa
Hadiah Istiméwa
Wado, 27 Mei
2019
|
O
|
pat poé katukang, manggih milik. Status kuring dikomén ku Ineu
Yuyun Yulistiani.
"Nay, aya honor Buku Piala Keur Ema, rék dicandak ka
Bandung bari sakalian téken kontrak jeung nyandak bukti terbit?"
Lain bobohongan, asa ditonjok congcot. Lir kagunturan madu
kaurugan menyan putih. Ku diangken midangna ge geus puguh atoh jeung reueus.
Sok komo bari dihonoran nu lain lumayan deui. Alhamdulillah.
Sakedapan komén téh teu dijawab. Bakating ku bungah. Ahirna
dijawab,
"Hayangna mah ka Bandung, Neu. Ngan barabé. Di imah barudak
keur karumpul. Jaba bulan puasa asa wegah mamangkatan jauh. Nyanggkeun wé
kumaha saéna, téken kapan tiasa perwakilan...!"
Cekéng. Ahirna mah sapuk we, méré alamat jeung nomer
rekening.
Teu kungsi lila, tring inbok. "Nay tos dikirim nya, sing
tambah sumanget ngarangna!" Cenah.
Alhamdulillah. Jazakallohu khoiron katsuro.
Bagja ku hiji ku dua. Bagja nakeran bisa babarengan ngeusian
lambaran buku Piala Keur Ema. Kumpulan Lima Welas Carpon pikeun Barudak, karya
sinerat babarengan sareng sababraha urang babaturan pangarang.
Reueus, bisa miluan aub ngeusian lolongkrang kasempetan dina
kasibukan ku kagiatan nu aya mangpaatna. Utamana pikeun barudak, sirung-sirung
harepan ka hareupna. Nu bakal nuluykeun hirup huripna Basa Sunda.
Dina haté, timbul karumasa nu pohara. Ras kana caritaan Yuyun
dina inbok,
"Sing tambah sumanget ngarangna!" Asa kahudang. Rumasa
keur melid ideu. Jaba kiwari keur katungkulkeun marémaan dagang onlén. Rumasa
masih kénéh diudag-udag pangabutuh. Karep nulis ngan saukur werat sahayuna.
Najan haté apluk-aplukan sono hayang nyeratkeun ideu. Tapi ku karipuh mah
unggal peuting susah nyaring. Bray beurang teu kaur ku dagang.
Ngupahan manéh, keun baé kapan sarua ibadah. Hasil dagang kapan
keur nyukakeun kulawarga. Kin dina waktu nu rinéh, rék ngahaja soaonoan jeung
ungkara. Ngajarumat deui carita. Nyeuseup ideu tina lolongkrang urang jeung
urang. Malah mandar kaalap mangpaat.***
#Ai Wawang
0 Response to "FIKMIN BASA SUNNDA- #Ai Wawang - Hadiah Istiméwa"
Posting Komentar