KAMANDANG BOLOSTRONG TUMALI SENI TRADISI SUNDA

KAMANDANG BOLOSTRONG TUMALI SENI TRADISI SUNDA

S

aupami salaku urang Sunda pituin atuh masarakat luar (anu dimaksad sanès pituin urang Sunda) anu nganjrek di tatar Sunda nanging sakedikna resep kana seni sareng budaya Sunda, bèh dituna nolih komo ngèmutan pasualan seni tradisi Sunda, kanggo saheulaanan sapertosna tiasa sedih, prihatin, tiasa janten ogè ambek, ah pokona bakal mancawura èmutan sareng hatè urang, anu cindekna tiasa pro and kontra kana kaayaan zaman kiwari.

Naha kitu? Kieu alesanana:

1) Katawisna seni Tradisi Sunda kirang perhatosan ti pihak pamarèntah, contona seueur seni tradisi Sunda anu kirang dimumulè komo dimekarkeun, alesanana teu payu dijual, teu aya waragadna kumargi dicorètan kagiatan ogè anggarana ku Oknum Eksekutif sareng Oknum Legislatif.

Rajeun dina ayana mung saukur cèrèmonial anu sifatna kaperyogian sahèab atanapi gebrag tumbila.

2) Tiasa janten ku pangaruh akulturasi seni turta budaya deungeun anu pangayakna (filter) kirang dièmutan, nya antukna kènging ku paribasa Jati ka silih ku Junti. Palangsiang ka payun, masarakat Sunda janten sakedik anu masih kènèh mikaresep ogè mikacinta kana seni Tradisi Sunda, komo marurangkalih sakola, malih tiasa janten beh dituna marurangkalih sakola lebeng oge poèkeun teu uninga naon wae contona ari seni tradisi tèh?.

3) Katawisna aya oknum jalmi anu sok ngaku-ngaku seniman atanapi budayawan Sunda anu ngaraos merjuangkeun oge ngagarap seni tradisi Sunda, padahal katawisna pupulasan, mung ukur kanggo kaperyogian karier jabatan, kauntungan pribadi, kelompok, pulitik

4) Pikeun kaperyogian gengsi pribadi bakat ku sieun teu diaku seniman atawa budayawan, nya oknum ngagunakeun rèka perdaya, tipu muslihat nepi ka ngèlèbètkeun bandèra sèwang-sèwangan ogè nepak dada yeuh kuring tèh seniman ogè budayawan anu cinta seni tradisi Sunda.

5) Saur cenah ogè bèja, urusan seni sareng budaya dianggap paling nguntungkeun pikeun ngahontal cita-cita, utami cita-cita pulitik, karièr jabatan para oknum. Naha enya kitu?

6) Seni sareng budaya Sunda ku para oknum sok rajeun dijantenkeun alat pikeun ngadudomba/manajemen konplik.

7) Dina enyana ogè, saupami aya kènèh jalmi anu mikaresep, mikacinta turta ngamumulè seni Tradisi Sunda, nanging katawisna kirang aya anu nolih kumargi panginten dianggap teu nguntungkeun ogè sanès baladns.

8) Teu seueur jalmi anu jeneng ogè janten pejabat anu kagungan wawanèn kanggo ngamangfaatkeun jabatan sareng kakuasaanana, komo wantun marèntahkeun oge nerapkeun seni tradisi Sunda di TK/SD/SMP/SMA/SMK/Dikti.

9) Aya hiji-hijieun oknum pejabat anu kasatukangna tina seni oge budaya Sunda, eeehhh malih jongjon dina padamelanana, teu pisan nolih, ngaideuan komo ngadamel program ngeunaan seni atanapi budaya Sunda mah,  _sapertosna_cul dogdog tinggal igel.

Pisanggem Pangersa Bapa Cècè Padmanagara sareng Pangersa Bapa Dudi Singadilaga salaku politisi Sunda sareng Pangersa Bapa Hidayat Suryalaga, Pangersa Bapa Wahyu Wibisana, Pangersa Bapa Koko Koswara, Pangersa Bapa Daeng Sutigna, Pangersa Bapa Ujo ngalagena, Pangersa Bapa Dana Setia, Pangersa Bapa Nano S salaku seniman oge budayawan Sunda: _*Saupami seni sareng budaya Sunda hoyong majeng turta nanjung, nya urang Sunda na sorangan kedah Ajeg, Panceg jeung Jejeg. Tong galideur komo teu istiqomah". Hèhèhèh...

Alhamdulillah.... sanaos kumaha waè oge, tètèla geuning aya kènèh pangagung-pangagung katut seniman budayawan Sunda anu masih komitemen, konsisten ogè konsèkuèn dina Seni Tradisi Sunda, sanaos jalmi-jalmi na alim diekspos komo digembor-gembor, kecapna bisi pajarkeun sombong cenah

Sakitu kamandang bolostrong ti sim kuring ngeunaan Seni Budaya Sunda, sanaos sakedik ogè sahèab, mugia aya mangfaatna kalayan janten barokah malah mandar seni sareng budaya Sunda tetep nanjung binarung karaharjaan. Aamiin.

Panutup catur, pamungkas carita, neda hapunten samudaya kalepatan ka sadayana, bilih aya basa anu teu katata, aya catur anu teu kaukur.  Bobo sapanon, carang sapakan!. Cag!

(Kang Ade S)

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: