Bilih aya nu Peryogi - MASRAHKEUN CALON PANGANTEN LALAKI

MASRAHKEUN CALON PANGANTEN LALAKI

M

inangka bubuka pisanggem, sim kuring nyanggakeun sadaya puji ka Allah Nu Murbeng Alam, anu midameul sareng ngurus bumi-langit katut eusina. Kuayana widi ti Anjeunna, urang tiasa kumpul ngariung di dieu, enggoning nepangkeun sareung manjangkeun silaturahmi, antawis kulawargi ti Citalang  sareng kulawargi ti Cibatu. Mugi-mugi waé ieu pajemuhan téh aya dina rido sareung ginulur rohmat Gusti Yang Widi.

Bapa Suhandi miwah Ibu sakalih.

Kitu deui wargi wargi anu sami ngaluuhan ieu pajemuhan, misanggeum di die téh minangka wawakil pun lanceuk, nya éta Bapa Tatang, ti Citalang. Sim kuring dipasihan pancén kedah masrahkeun putrana pun lanceuk, wastana pun Bagus, anu insya Allah moal lami deui badé didahupkeun ka putra bapa Suhandi namina Néng Lina Marlina, S.Sos. kantenan, ieu pancén téh kanggo sim kuring mah teu kinteun abotna. Rumaos pisan, sim kuring tuna ku pangabisa. Sok rajeun sotéh aya anu ngahiras, ukur purah janten anu naktak mundak, kurad-koréd pucal-pacul. Dupi ayuena, bet kedah wawakil kanggo masrahkeun pipanganténeun. Asa rémpan sim kuring téh. Rémpan kudu kutilu. Boh bilih ieu pancén henteu kaawakan ku sim kuring. Boh bilih aya basa nu kirang merenah larapna. Namung, kumargi tos dipasihan kapercantenan anu sakitu ageungna ti kulawargi pun lanceuk, asa awon kasebatna upami éta kapercantenan ku sim kuring dimomorékeun. Nya badé lahlahan waé ieu mah, badé nyobi-nyobi, étang-étang lauk buruk milu mijah. Jalaran kitu, langkung ti payun neda sihapunteun, bilih aya catur nu teu kaukur, bilih aya basa nu teu Karéka.

Bapa Suhandi miwah ibu sakalih.

Pun lanceuk sawargi-wargi darongkap kadieu téh seja aya anu dipimaksad. Rupina ku Bapa sareng Ibu Suhandi ogé parantos kagalih. Namung teu aya lepatna saupami ku sim kuring didadarkeun deui kalawan langkung tandes.

Janteun kieu gék-gékanana mah :

Pun lanceuk téh gaduh budak, wastana pun Bagus. Nuju meujeuhna belekeseteng. Upami dipapandeékeun kana hayam mah nuju jajangkar. Duka kumaha ngawitanana, éta pun alo téh sering ngalalar ka Cibatu. Meusmeus kereles teu aya di rorompok. Singhoréng téh geuning aya nu dianjing cai, aya nu dihéroan. Lami-lami rupina téh dugi kawantun unggah. Tétéla geuning pun alo téh tos kabandang ku mojang lenjang pencaran ti Cibatu, anu teu aya sanés putra kameumeut Bapa Suhandi, nya éta Néng Lina Marlina téa.

Pun lanceuk téh aya bingah aya rémpah. Dupi bingahna, éta geuning  gaduh budak lalaki, pun Bagus téa, tos aya gerentes niat rarabi. Ari rarabi téh, kanggé urang nu nganut agama Islam, apan janten salahsawios sunah Rosul. Jalaran kitu, rumah tangga téh mangrupi bagian tina ibadah. Éta kabingah anu teu kinten ageungna téh dupi nu mantak rémpan, boh bilih mojang nu dipikahoyong pun Bagus téh ninggang kana babasan lain banban lain pacing, kananga kuduna, lain babad lain tanding lain kadinya kuduna, piit ngeundeuk-ngeundek pasir, cilencang mandé sagara. Margi tangtosna ogé tos ka uninga ieuh, urang kampung bau lisung, rundayan bulu taneuh tukang bebelokan dina leutak. Moal badé di sumput-sumput,  da tos nembrak ieuh. Mung sakitu buktosna.

Sok sanaos bari risi tur rémpan, pun lanceuk téh lah-lahan ngayakeun pamarekan ka kulawargi Bapa Suhandi. Sawios disebat nahap-nahap keun manéh ogé, da pamaksadan mah saé ieuh, hoyong manjangkeun silahturahmi manawi bahan katampi.

Alhamdulilah, geuning panampian ti kulawargi Bapa Suhandi téh sakitu saéna. Éta kasaéan kanggo pun lanceuk mah beurat nyuhun beurat nanggung katampi pisan kasaéan Bapa Suhandi téh.

Jinisna, nya éta pun Bagus sareng Néng Lina parantos batu turun keusik naék, kitu deui sepuhna tumampi kalawan léah. Atuh teu kinteun bingahna. Dua pihakanana parantos jinek, tos puguh bulé hideungna. Dua pihakanana parantos sapuk yén kulawargi Bapa Suhandi sareng kulawargi pun lanceuk badé ngaraketkeun kawargian, nya éta ku jalan ngadahupkeun pun Bagus ka Néng Lina.

Ayeuna cunduk waktu datang mangsana, babadatenan kulawargi pun lanceuk sareng kulawargi Bapa Suhandi téh badé dipaheutkeun dinteun ieu pisan. Ka anu haladir di dieu ogé tangtosna tos kasaksén, kumaha dadahutna Bapa Suhandi kanggo ngalaksanakeun jatukrami putrana. Uleman parantos sarumping kitu deui bapa-bapa patugas ti Kantor Urusan Agama. Jalaran kitu, sim kuring anu ngawakilan kulawargi pun lanceuk ti Citalang, seja masrahkeun pun alo, anu wasta lengkepna pun Bagus Ginanajar, SE, bin Tatang Mustari, kango di tikahkeun ka Néng Lina Marlina, S.Sos binti Suhandi, S.Pd,.M.M., pamugi Bapa Suhandi miwah Ibu sakalih ulah disaha-saha. Pamugi ditampi ku kaweningan galih.

Taya leupatna ku sim kuring didugikeun ka Bapa sareng Ibu Suhandi, réhna leres pisan pun Bagus Ginanjar upami ditinggal lahiriah mah parantos jalugjug jangkung, namung jero-jerona mah masih kénéh seueur pisan katunana. Sepi harti tuna pangabisa. Janten masih kénéh bingbingeun. Upami dipapandékeun kana pacul mah, pacul nembé bijil ti gasoli, doranna ruyung kawung anu masih kénéh kasar teu acan ngambeu hampelas. Seseg, ari sesegna mah. Mung duka raoseun heunteuna mah. Mugi-mugi waé ieu pacul téh mendak sawah anu lendo rupina téh, keun waé sina teras-teran macul, engké ogé geura teu burung panén.

Ti Citalang ka Cibatu

nyimpang heula meuli kendi

Pa Tatang rék boga minantu

putrana Bapa Suhandi

Nyimpang heula meuli kendi

geuning loba nu meulina

putrana Bapa Suhandi

jenenganana Néng Lina

Geuning loba nu meulina

marilih meunang nu alus

jeunenganana Néng Lina

nu kapilih nya cép Bagus

Marilih meunang nu alus

mawana disakalikeun

nu kapilih nya cép Bagus

ayeuna rék disérénkeun

Bapa miwah ibu Suhandi sakalih.

Pun Bagus, ibu ramana, katut sawargi wargi ngahaja dongkap ka dieu. Namung punteun waé, dongkap na kulawargi pun lanceuk téh éstu mung ukur badé nyesahkeun. Teu jingjing teu bawa, komo dituturkeun ku nunaranggung dongdang sapurartina mah. Henteu, teu pisan. Sanés teu aya maksad, tapi da kumaha mung sakieu buktosna. Sanaos kitu, ieu mah tambi indit ngaligincing tamba keupat ngagandeuang, tamba pamali teuing, nya aya kagegelan mah ti pun alo. Hatur lumayan waé encit saceuwir étang-étang kanggo minuhan juru dapur, sareng lalab rumbah kénging ngundeur saaya-aya. Paralun sanés badé ngahinakeun, ieu mah éstu tawis kabingah anu clik pitih clak hérang, kénging kampal kempel ladang rikrik gemi, bélaan ngadua-duakeun tina huap. Pamugi waé Bapa miwah Ibu Suhandi teu ninggal tina jihat pangaos tina rupina. Mangga nyanggakeun ieu ogé.

Sakitu anu kapihatur. Bobo sapanon carang sapakan, pamugi agung cukup lumur kersa ngahapunteun. Minangka pamungkas, sim kuring ngadu”a ka Anu Maha Kawasa, pamugi waé rumah tangga anu badé diwangun ku pun Bagus sareung Néng Lina Marlina téh sing aya dina rido Gusti. Sing lambat-lambat laun dugi kasalalamina. Atuh para sepuh sareung wargi-wargi ti dua pihakanana sing tiasa maparin tuladan anu saé.

Cag teundeun dina handeuleum sieum, tunda dina hanjuang siang paranti nyoikotninggaklkeun.

Wassalamualaikum warahmatullahi wabarakatuh

Cag.  

REDAKTUR : Kiwarta

Sudah saatnya bangkit dari keterpurukan...

Subscribe to receive free email updates: